វត្តស្ងូនពេជ្រ៖ មន្ទីរសន្តិសុខប្រចាំស្រុកអង្គស្នួល
ដោយ ផេង សុភានាថ
វត្តស្ងួនមានទីតាំងនៅឃុំកន្ទោក ស្រុកអង្គស្នួល ខេត្តកណ្តាល ត្រូវបានស្គាល់ថាជាមន្ទីរសន្តិសុខក្នុង របបខ្មែរក្រហម។ នៅក្នុងឆ្នាំ១៩៧៦ ខ្មែរក្រហមបានបង្កើតមន្ទីរសន្តិសុខប្រចាំស្រុកអង្គស្នួល ដោយប្រមូល អ្នកទោសមកពីគ្រប់ឃុំ ដោយប្រើប្រាស់ទីតាំងនៅក្នុងវត្តស្ងួនពេជ្រនេះសម្រាប់ការឃុំឃាំង ធ្វើទារុណកម្ម និងសម្លាប់ចោល នេះបើយោងតាមឯកសារទស្សនាវដ្តីស្វែងរកការពិត បោះពុម្ភផ្សាយ ក្នុងត្រីមាសទី២ ឆ្នាំ២០១០ ដោយមជ្ឈមណ្ឌលឯកសារកម្ពុជា។
នៅក្នុងអត្ថបទមួយដែលមានចំណងជើង “រំលឹកថ្ងៃចងចាំ៖ មន្ទីរបូជនីយដ្ឋានវត្តស្ងួនពេជ្រ” បានសរសេរ ដោយលោកផឹង ពង្សរ៉ាស៊ី បានឲ្យដឹងថាជនរងគ្រោះនៅទីនោះមានទាំងប្រជាជន ថ្មីដែលត្រូវ បាន ចោទប្រកាន់ថាជា ខ្មែរស សេអ៊ីអា កាហ្សេបេ អតីតមន្រ្តីរបបចាស់ ព្រមទាំងប្រជាជនមូលដ្ឋាន ដែល មិនគោរព តាមបទបញ្ជារបស់អង្គការ ឬ មិនបានបម្រើបដិវត្តន៍ឱ្យបានល្អ។ ក្នុងនោះផងដែរក៏មាន អ្នកទោស ជាជនជាតិភាគតិច ចិន និងចាម ផងដែរ។ បូជនីយដ្ឋានមួយត្រូវបានសាងសង់ឡើង ក្នុងបរិវេណវត្តស្ងួនពេជ្រ កាលពីឆ្នាំ២០១០ ដើម្បីចងចាំការរងទុក្ខវេទនាក្នុងរបបខ្មែរក្រហម និងឧទ្ទិសដល់អ្នកដែល បានស្លាប់ ក្នុងរបបខ្មែរក្រហមនោះ។
ខ្លោងទ្វារចូលទៅកាន់វត្តស្ងួនពេជ្រ ដែលស្ថិតនៅខាងឆ្វេងដៃនៃផ្លូវជាតិលេខ៤ ក្នុងឃុំកន្ទោក ស្រុកអង្គស្នួល ខេត្តកណ្តាល។
បូជនីយដ្ឋានវត្តស្ងួនពេជ្រ ដែលមានសណ្ឋានស្រដៀងគ្នានឹងបូជនីយដ្ឋានជើងឯក ត្រូវបានបញ្ចប់ ការសាងសង់នៅពាក់កណ្តាលខែឧសភា ឆ្នាំ២០១០ និងប្រកាសជាសាធារណៈនៅថ្ងៃទី១៩ ខែឧសភា ឆ្នាំ២០១០។ ជារៀងរាល់ឆ្នាំនៅថ្ងៃទី២០ ខែឧសភា ប្រជាជនកម្ពុជាធ្វើការរំឭកដល់ជនរងគ្រោះ និងការឈឺចាប់ ពីឧក្រិដ្ឋកម្មដែលកើតមានក្នុងរបបកម្ពុជាប្រជាធិបតេយ្យ ហើយនៅឆ្នាំ២០១៨ រដ្ឋាភិបាលកម្ពុជា បានកំណត់ថ្ងៃទី២០ ខែឧសភាជា “ទិវាជាតិនៃការចងចាំ”។
ឆ្អឹងលលាដ៍ក្បាលនៃជនរងគ្រោះពីរបបខ្មែរក្រហមដែលបានស្លាប់ក្នុងបរិវេណវត្តនេះ ត្រូវបាន ប្រមូលមក ដាក់តម្កល់ក្នុងបូជនីយដ្ឋាននេះ។ ក្រោយពីរបបនេះបានដួលរលំ ប្រជាជនបានគាស់រណ្តៅ សាកសពនៅ ជុំវិញវត្តនេះហើយប្រមូលឆ្អឹងតម្កល់ក្នុងអគារមួយស្ថិតប៉ែកខាងលិចឆៀងខាងត្បូងព្រះវិហារ។ក្រោយមកដោយសារ តែភាពចាស់ទ្រុឌទ្រោម អគារនោះត្រូវវាយចោល ហើយឆ្អឹងជនរងគ្រោះត្រូវដាក់ តម្កល់ជាបណ្តោះ អាសន្នក្នុងសាលាឆាន់ រហូតដល់ការសាងសង់បូជនីយដ្ឋាននេះ។
ព្រះវិហារនេះត្រូវបានកសាងឡើងវិញ។ ព្រះវិហារចាស់នៅក្នុងវត្តនេះត្រូវ បានខ្មែរក្រហមប្រើប្រាស់ ជារោងបាយ។
ព្រះវិហារដែលត្រូវបានសាងសង់ថ្មីនេះ ធ្លាប់ជាកន្លែងកប់សាកសពនៅក្រោមនោះ និងមានប្រមាណ ចន្លោះពី២០០ទៅ៥០០នាក់។
ស្រះទឹក ស្ថិតនៅខាងស្តាំនៃព្រះវិហារ គឺជាកន្លែងគេយកសាកសពអ្នកទោសមកបោះចូលទៅក្នុងទឹក បន្ទាប់ពីអ្នកទោសនោះត្រូវបានគេធ្វើទារុណកម្មនិងសម្លាប់ចោល។
កម្រងរូបភាពថ្មីៗ
ដំណាក់កាលដែលប្រជាជនកម្ពុជាបានឆ្ល...
សូ វិទូ
មន្ទីរសន្តិសុខវត្តបារាយណ៍ជាន់ដ...
ទ្រី សុជាតា