កោះតាងបានបន្សល់ទុកនូវប្រវត្តិសាស្ត្រដ៏សំខាន់មួយ ដែលជាមូលដ្ឋានកងទ័ព ជើងទឹករបស់កម្ពុជា។ កោះតាងស្ថិតនៅចម្ងាយប្រមាណជាង៥០គីឡូម៉ែត ពីឆ្នេរសមុទ្រខេត្តព្រះសីហនុ។ កាលពី៤៣ឆ្នាំមុនក្នុងសម័យខ្មែរក្រហម មានហេតុការណ៍មួយបានកើតឡើងនៅលើកោះតាង ដែលបណ្តាលឲ្យកោះទាំងមូល ក្លាយទៅជាសមរភូមិ ដែលពោរពេញទៅដោយការទម្លាក់គ្រាប់បែក ប្រៀបដូចជាទឹកភ្លៀង និងការបាញ់តតាំងគ្នារវាង អង្គភាពយោធាខ្មែរក្រហម និងទាហានជើងទឹក របស់អាមេរិក។ ការប៉ះទង្គិច មានរយៈពេល៣ថ្ងៃ និងមានមនុស្សរាប់សិបនាក់ស្លាប់បាត់បង់ជីវិត។ ក្រៅពីឯកសារជាច្រើនដែលបានសរសេរអំពីការប៉ះទង្គិច ពីទស្សនៈ របស់ខាងយោធាអាមេរិកយ៉ាងណាក៏ដោយ ក៏អតីតទាហានខ្មែរក្រហមបីរូបបានផ្តល់បទសម្ភាសន៍ នៅក្នុងភាពយន្តឯកសារមួយនេះដើម្បីវិភាគ អំពីការប៉ះទង្គិចនេះ ដែលជា​ ការប្រយុទ្ធចុងក្រោយ នៃសង្គ្រាមវៀតណាម។