ស្ថានទូតអាមេរិកនាឆ្នាំ១៩៧៥
ស្ថានទូតអាមេរិកក្នុងសម័យសាធារណៈរដ្ឋកម្ពុជា
ដោយ ការីនិពន្ធ
ស្ថានទូតអាមេរិកមានទីតាំង៥ ផ្សេងគ្នាទៅតាមសម័យកាលនានានៃប្រវត្តិសាស្ត្រកម្ពុជា។ ក្រសួងការបរទេសអាមេរិក បានចាប់ផ្តើមទំនាក់ទំនងការទូតផ្លូវការក្នុងឆ្នាំ១៩៥០ ហើយបានបញ្ចូនអ្នកការទូត ព្រមទាំងបើកការិយាល័យតំណាងសហរដ្ឋអាមេរិកនៅសណ្ឋាគារឡឺរ៉ូយ៉ាល់នាឆ្នាំដដែល។ ក្រោយកម្ពុជាទទួលបានឯករាជ្យ អាមេរិកបានបើកស្ថានទូតនៅផ្លូវ ព្រះស៊ីសុវត្ថិយុទ្ធវង្ស កែងផ្លូវ ឧកញ៉ា ហ៊ីងពេញ ចម្ងាយមួយគីឡូម៉ែត្រពីរមណីយដ្ឋានប្រវត្តិសាស្ត្រវត្តភ្នំ។ បន្ទាប់មកបានប្តូរមកផ្លូវស្រុកទ្រាំង មុននឹងទំនាក់ទំនងការទូតត្រូវបានកាត់ផ្តាច់នាឆ្នាំ១៩៦៥។
នៅក្នុងសម័យសាធារណរដ្ឋខ្មែរដែលគាំទ្រដោយរដ្ឋាភិបាលអាមេរិក ស្ថានទូតអាមេរិកស្ថិតនៅតាមបណ្តោយមហាវិថីព្រះនរោត្តមកែងនឹងមហាវិថីសុធារស។ បច្ចុប្បន្នទីតាំងនេះគឺជារដ្ឋបាលជលផល។
នាពេលព្រឹកថ្ងៃទី១២ ខែមេសា ឆ្នាំ១៩៧៥ គឺ៥ថ្ងៃមុនការដួលរលំនៃរាជធានីភ្នំពេញ រដ្ឋាភិបាលអាមេរិកបានជម្លៀសបុគ្គលិកទូត ប្រជាពលរដ្ឋអាមេរិក ព្រមទាំងជនជាតិកម្ពុជាដែលមានទំនាក់ទំនងជាមួយអាមេរិកមួយចំនួនចេញពីប្រទេសកម្ពុជាតាមរយៈប្រតិបត្តិការ Operation Eagle Pull តាមរយៈការដឹកតាមឧទ្ធម្ភាគចក្រចំនួន ១២គ្រឿងពីទីតាំងពីរកន្លែងស្ថិតនៅក្បែរស្ថានទូត។
អាមេរិកបានបន្តទំនាក់ទំនងការទូតជាមួយប្រទេសកម្ពុជា ក្នុងឆ្នាំ១៩៩២ ដោយដំណើរការស្ថានទូតនៅផ្លូវ២៤០ ក្រោយសាលាមត្តេយ្យ៨មីនា។ ទីតាំងស្ថានទូតបច្ចុប្បន្នស្ថិតតាមបណ្តោយផ្លូវលេខ ៩៦ នៅក្បែររមណីយដ្ឋានប្រវត្តិសាស្ត្រវត្តភ្នំ ដែលជាអតីតកន្លែងហាត់ប្រាណឈ្មោះ Le Cercle Sportif សម្រាប់ជនជាតិបារាំងនិងជនបរទេសហែលទឹកនិងលេងតេនីស៕
