ក្រុមប្រឹក្សាអភិវឌ្ឍកម្ពុជា
កន្លែងស្នាក់នៅនិងធ្វើការរបស់ ប៉ុល ពត ត្រូវបានសម្គាល់ដោយពាក្យកាត់ហៅថា មន្ទីរ ក.១ ប៉ុន្តែព័ត៌មានអំពីមេដឹកនាំខ្មែរក្រហមមានការលាក់ការណ៍សំងាត់ខ្លាំងបំផុត។ មិនមានអ្នកណាដឹងថា មន្ទីរ ក.១ នៅកន្លែងណានោះទេ។ អ្នកកាសែតអាមេរិកាំង Elizabeth Becker បានសម្ភាសន៍ ប៉ុល ពត នៅឯ Hotel Du Gouvernement នៅមិនឆ្ងាយប៉ុន្មានពីវត្តភ្នំ។ សូម្បីតែពេលជិតចុងក្រោយបង្អស់នៃរបបខ្មែរក្រហមនេះ ប៉ុល ពត បានជួបជាព្រះបាទ នរោត្តម សីហនុ ក៏ស្ថិតនៅអគារសណ្ឋាគារ Hotel Du Gouvernement នេះផងដែរ ដើម្បីបញ្ចុះបញ្ចូលទ្រង់ឲ្យទាមទារការគាំទ្រនៅអង្គការសហប្រជាជាតិអំពីការឈ្លានពានរបស់វៀតណាម។ អគារនេះដើមឡើយជាលំនៅដ្ឋានរបស់មន្ត្រីជាន់ខ្ពស់បារាំងក្នុងសម័យអាណានិគមបារាំង ហើយក្រោយមកក្លាយជាសណ្ឋាគារសម្រាប់ភ្ញៀវជាន់ខ្ពស់របស់រដ្ឋាភិបាលឯករាជ្យកម្ពុជា ក្នុងសម័យសង្គមរាស្ត្រនិយម។ បច្ចុប្បន្នអគារនេះ គឺជាអគារការិយាល័យធ្វើការរបស់ស្ថាប័នរដ្ឋដ៏សំខាន់មួយ គឺក្រុមប្រឹក្សាអភិវឌ្ឍកម្ពុជា។
