ពហុកីឡាដ្ឋានជាតិអូឡាំពិក
ដោយ ការីនិពន្ធ
ពហុកីឡាដ្ឋានជាតិអូឡាំពិក ឬស្តាតអូឡាំពិក បានបញ្ចប់ការសាងសង់នៅឆ្នាំ១៩៦៤ សម្រាប់គម្រោងធ្វើជាម្ចាស់ផ្ទះកីឡាអាស៊ីអាគ្នេយ៍ ប៉ុន្តែគម្រោងនេះត្រូវបានបោះបង់ទៅវិញ ដោយសារហេតុផលនយោបាយនាជំនាន់នោះ។ បច្ចុប្បន្នពហុកីឡាដ្ឋាននេះគឺជាកន្លែងហាត់ប្រាណសាធារណៈ សម្រាប់ប្រជាជនក្នុងរាជធានីភ្នំពេញ សម្រាប់អត្តពលិកហាត់ត្រៀមប្រកួតកីឡា ក៏ដូចជាសម្រាប់ការប្រារព្ធពិធីធំៗ ដោយសារសមត្ថភាពក្នុងការផ្ទុកមនុស្សបានរហូតដល់៧០០០០នាក់។
នៅក្នុងសម័យខ្មែរក្រហម ស្តាតអូឡាំពិកក៏ត្រូវបានប្រើប្រាស់ជាកន្លែងសម្រាប់ប្រារព្ធពិធីធំៗជាច្រើន មានដូចជាមហាសន្និបាតបក្សកុម្មុនីស្តកម្ពុជា ការប្រារព្ធពិធីខួបបក្សឬមិទិ្ទញជាដើម។
តាមរយៈសក្ខីកម្មនៅតុលាការខ្មែរក្រហមរបស់អតីតយោធាខ្មែរក្រហមម្នាក់ (លោកត្រូវបានសម្គាល់ដោយលេខកូដ 2-TCW-900 ) បានឲ្យដឹងថា ស្តាតអូឡាំពិកក៏ជាទីបញ្ជាការរបស់កងពល១៤ ដែលក្រោយមកដូរឈ្មោះ ជាកងពល ៨០១ ក្នុងចុងឆ្នាំ១៩៧៥។ កងពល១៤ ឈរជើងការពារភូមិសាស្ត្ររាជធានីភ្នំពេញ ពីរាជាយស្ម័យានរហូតដល់ក្បែរព្រលានយន្តហោះពោធិ៍ចិនតុង។ ក្រោយមកកងពល៨០១ ត្រូវបានបញ្ចូនទៅឈរជើងនៅខេត្តរតនគិរី ព្រំប្រទល់ប្រទេសវៀតណាម៕
