អ្នកស្រី ផេង ផាន់ សព្វថ្ងៃមានអាយុ ៦៥ ឆ្នាំ គឺជាអតីតអ្នកអានព័ត៌មាននៅវិទ្យុជាតិ និងជាតារាសម្តែង។ នៅឆ្នាំ ១៩៧៩​​ អ្នកស្រីបានរួចផុតពីការស្លាប់នៅ ឯគុកមួយ​ ក្នុង​ជំនាន់ខ្មែរក្រហម។ ក្នុងអំឡុងពេលជាប់ឃុំឃាំងនៅឯវត្ត​ចំពុះក្អែក អ្នកស្រីបានមើលឃើញការ ធ្វើទារុណកម្មផ្សេងៗ របស់យោធាខ្មែរក្រហមលើអ្នកទោសដទៃទៀត។ អ្នកស្រីស្ទើរតែបាត់បង់ ជីវិតនៅទីនោះ ប៉ុន្តែអ្នកស្រីគឺជាមនុស្សម្នាក់ក្នុងចំណោមអ្នកទោសមួយចំនួនតូចដែលរត់គេចខ្លួន។ ប្រមាណជា៤ ទសវត្ស ក្រោយមក អ្នកស្រីនៅតែអាចរំលឹកពីព្រឹត្តិការណ៍ ដែលកើតឡើងបានយ៉ាងច្បាស់លាស់ ។ ដោយធ្លាប់បានឆ្លងកាត់ បទពិសោធន៍ជូរចត់នៅក្នុងរបបនោះ អ្នកស្រីបានសម្រេចចិត្តបង្កើត មជ្ឍមណ្ឌលកុមារកំព្រាមួយដែលមានឈោ្មះថា សមាគមវប្បធម៌ចលនាជាតិដើម្បីកុមារកំព្រា កុមារក្រីក្រ។