ដោយ ហេង ពុទ្ធិរក្ស
ចាប់តាំងពីពេលឡើងកាន់អំណាចឆ្នាំ១៩៧៥ ខ្មែរក្រហមបានចាប់ផ្តើម ផលិតភាពយន្តឃោសនាពីរបបដឹកនាំរបស់ខ្លួន។ កម្មាភិបាលដែលចូលរួមផលិតភាពយន្តឃោសនាទាំងនេះ ត្រូវបានគេជឿថាបានទទួលការបង្ហាត់បង្រៀនបច្ចេកទេសពីជំនាញការមកពីប្រទេសចិន វៀតណាមនិងអឺរ៉ុបប៉ែកខាងកើត។ វីដេអូឃោសនាទាំងនោះនិយាយពីទស្សនវិស័យនិងការរីកចម្រើននៃរបបនេះ រួមមានការសាងសង់ប្រព័ន្ធធារាសាស្ត្រធំៗ និងការធ្វើកសិកម្មទូទៅ។ ខ្មែរក្រហមមិនបានបង្ហាញពីការពិតនៅកម្ពុជានាសម័យនោះទេ ហើយបានលាក់បាំងនូវទង្វើអមនុស្សធម៌ជាច្រើនរបស់ខ្លួន។ បច្ចុប្បន្ន យ៉ាងហោចណាស់មានវីដេអូឃោសនាចំនួន៧៨ ដែលបានផលិតដោយកម្មាភិបាលខ្មែរក្រហម ត្រូវបានគេរកឃើញ ហើយបាននឹងកំពុងរក្សាទុកដោយមជ្ឈមណ្ឌលបុប្ផាណា។